跳到主要內容區塊
mobile_menu
:::

社區故事介紹

歸來社區故事卷軸 
發佈日期:105-12-27    資料來源:屏東市公所    
歸來仨寶𨑨

「番花,番花,媠媠仔五片花,清清的黃,抹砥中央,清清的白,滿身軀。歸欉番花,看著田蠳,相著鳥仔,帶著㑑的夢,歸括仔地自由飛。番花骹,來泡茶,一人一杯,娥母著愛炕歸暝。踮砥大廟口,顧著㑑的家,永遠蹛作伙,加㑑陪。恬恬幾落百年,日子一天一天過,未曉生氣,呣覓哭過,正港伊是,歸來,番花!歸來,番花!」番花歌,正是歸來老中青少年,砥慈天宮大廟埕,番花王樹骰,為代替龍榕,陪伴媽祖、洪公祖,共同守護歸來即片土地的「台灣番花王」祝壽的心聲!

若砥下哉仔時來到歸來,沿廟埕番花骹踅一輾,會董看著古早味的媽祖廟,踮砥確早日本警察駐在所宿舍地面上,新廟砌砥駐在所的位置,面向歸仁路衝,不時歡迎著所有的人,來歸來番花骹𨑨迌。砥廟埕早市,要會記得撿寡仔娥母(牛蒡)、豆仔薯、蔥仔,..,路邊順手買一罐娥母茶,徛起去廟階戶定,加媽祖、洪公祖拜一下禮,越頭來欣賞台灣尚大、尚媠,荷蘭人所種落的番花欉,開著淡薄仔清芳的番花!即時,目瞅相著番花王佮慈天宮,心肝頭想起早當時,歸來人鄭康卿「出銀一千,無夠攬尾」來砌屏東媽祖廟(慈鳳宮)的戴誌,㑑的「軟身媽祖」出巡十八庄頭,轉來「後頭厝(娘家)」,逐回攏流目屎(落雨)的故事,一片思古幽情自然昇起,原來,㑑的屏東,砥阿祖的時代,嗎叫「歸來庄」。

順著歸仁路向南行五百公尺,正手爿,番花連鎖磚的巷道越入去,會董看著覕砥巷仔內的歸來火車站。確早的舊車頭,位有專人賣票、收票,到只有月台的冷清,今仔無共嘍,鐵支路徙就高架頂,懸懸新砌的車站,若位高架月台向西南看去,有娥母田、豆仔薯園、蔥仔股、...,屏東平原的黃昏日落、農村美景,位遮看尚媠。無聊㑹時,坐踮椅仔頂,欣賞來來去去的風塵列車,體會南北奔波,有時嗎是一種快樂。尤其是暗時仔來看,久久仔一陣閃熾的列車光影,位遠就近,佫再竄入烏暗空間,呣管是翕像,亦是攝影,攏是享受。

向北走入去高架鐵路骹,遠遠長長、由面到點的長線,是屏東新造的鐵路鐵馬道,中央藏著目前全國尚長的3D彩畫地景,砥3D鐵路頂翕像,若親像囡仔時陣,行砥紅橋頂,行一步礤三下,許種強要跋落去的驚惶,砥咧抾著豆仔薯了後,歸個人著歡喜笑微微,加上騰空飛行的歸來車票,媠噹噹的番花,砥遮,嗎會董于你翕加滿載而歸。喔,要走進前,小運動一下,砥遮的器材設備,嗎會幫你維護健康啦!

繼續向北行到路口,即條街正是當咧發展的歸來農創聚落藝術一條街,頭前面就是歸來社區活動中心佮生態節能公園。遮原本是「後濫埔-㑑祖先仔的"夜總會"」,今仔,系是歸來人社區營造的中心,關懷據點志工隊,守望相助巡守隊,環保志工隊,媽媽教室,老人會,歸來青年工作隊,太鼓團,河洛八音團,攏是砥遮。活動中心門口埕的八卦,生態番花公園的河圖洛書,展現河洛文化的核心價值,表明㑑是河洛文化成養大漢,歸來庄就是河洛庄。向東直行二百公尺,發現歸來三寶,娥母(牛蒡)、豆仔薯、蔥仔,媠媠褿褿貼砥巷仔口的牆仔面,親像咧加逐個拍招呼!三寶牆斜對面是八音鑼鼓番花柱,拄好砥豆仔薯伯的茨骹,砥遮,會董招請八音的老師父,挨一段台灣殼仔弦,順續奏一首八音扮仙幼曲,將古早味的河洛文化藝術,袋入去心肝芛仔,抸轉去沓沓仔享受。
地圖:

  • 相關圖片
    1. 歸來雞蛋花、慈天宮.jpg(共4張)
    2. 鐵道3d彩畫地景.jpg(共4張)
    3. 歸來社區活動中心太鼓.jpg(共4張)
    4. 歸來河洛八音團.jpg(共4張)